RIB yerekanye abantu 7 bashinjwa kwambura no gushuka abaturage

Urwego rw'Igihugu rw'Ubugenzacyaha 'RIB', kuri uyu wa Mbere tariki ya 10 Werurwe 2025, rwerekanye abantu bafashwe bakurikiranyweho ibyaha bitandukanye.

Mu bafashwe harimo abagore babiri n'abagabo batanu bakurikiranyweho icyaha cy'ubwambuzi bushukana, aho buri umwe yari afite amayeri yihariye yakoreshaga mu kwambura abantu mu bihe bitandukanye.

RIB ivuga ko bafashwe bamaze kugurisha ubutaka butari ubwabo bungana na metero kare ibihumbi 18, bukasemo ibibanza 60 biherereye mu karere ka Bugesera.

Abafashwe bari bamaze kwakira amafaranga Miliyoni 141frw, ndetse n'ibihumbi 42 by'Amadolari yose ahwanye n'igiciro cy'ubutaka bari bagurishije butari ubwabo.

Hari kandi abakurikiranyweho kwiyitirira urwego rw'ubutabera bakaka abantu amafaranga babizeza ko abantu babo bazafungurwa. RIB ivuga ko hari n'abiyitirira ubutaka, ndetse n'abashuka abantu bakabacucura utwabo.

Urwego rw'Ubugenzacyaha rwemeza ko hari n'abandi bagishakishwa.