Rulindo: Abantu 20 ni bo bamaze guhitanwa n'impanuka ya bisi

 

Mu butumwa Guverinoma y'u Rwanda yashyize hanze yihanganishije ababuriye ababo mu mpanuka y'imodoka imaze guhitana abagera kuri 20, abandi bagakomereka.

Abakomeretse bakaba bakomeje kwitabwaho n'abaganga.

Ni mu mpanuka y'imodoka ya bisi yari itwaye abagenzi 52 mu muhanda Kigali-Musanze. Ikaba yabereye mu Murenge wa Rusiga w'Akarere ka Rulindo.

Ibi byabaye ku gicamunsi cyo kuri uyu wa Kabiri tariki 11 Gashyantare 2025, bivugwa ko iyi bisi yaturitse ipine irenga umuhanda igwa mu kabande muri metero zirenga 200.

Guverinoma yatangaje ko iratanga ubufasha bukenewe ku babuze ababo no ku bakomerekeye muri iyi mpanuka.

Yaboneyeho no kwibutsa abakoresha umuhanda by'umwihariko abatwara ibinyabiziga, kubahiriza amategeko agenga umuhanda hagamijwe kwirinda impanuka.