Mu Rwanda hagaragaye abarwayi ba Malariya ibihumbi 83 mu kwezi kumwe

Mu gihe imibare yerekana ko muri Mutarama 2025, mu Rwanda hagaragaye abarwayi ba Malariya ibihumbi 83. Ikigo cy'Igihugu gishinzwe Ubuzima 'RBC' cyatangaje ko mu kwezi kwa Mata uyu mwaka, hari imiti mishya ivura malariya izatangira gukwirakwizwa.

Biteganyijwe ko ku ikubitiro imiti izagezwa ku bigo nderabuzima, amavuriro y'ibanze, ndetse no ku bajyanama b'ubuzima, hagamijwe guhangana n’iyi ndwara ikomeje kwiyongera mu Rwanda.

Mu Karere ka Gasabo by'umwihariko ku Kigo Nderabuzima cya Kinyinya, ni hamwe mu hagaragara umubare munini w'abarwayi ba Malariya aho mu kwezi bakira abagera kuri 700, abandi 800 bakavurwa n'abajyanama b'ubuzima bakorana n'iki kigo nderabuzima.

Dr. Hypolite Bwiza Muhire, umuganga ukurikiranira hafi ibijyanye n'indwara ya Malariya Ku bitaro bya Kibagabaga, asobanura ko hari imiti ihabwa abarwayi ntigire icyo ibamarira, mu gihe udukoko twa Malariya twarushije imbaraga imiti bahawe mbere.

Umuyobozi w'ishami rishinzwe kurwanya Malariya mu Kigo cy'Igihugu gishinzwe Ubuzima, Dr. Aimable Mbituyumuremyi, yemereye RBA ko abafata nabi imiti ya Malariya ari bo ntandaro y'ikwirakwira rya Malariya yihinduranyije.

RBC itangaza ko hari ubushakashatsi bwakozwe ku bigo nderabuzima bike bwagaragaje ko 80% by'abafashe umuti wa Quartem ari bo gusa bakira neza.

Abarwayi ba Malariya ibihumbi 83 bagaragaye, muri bo ibihumbi 70 ni abo mu turere 15 gusa, biganjemo abo muri Gasabo na Kicukiro; aho abagera kuri 285 barwaye Malariya y'igikatu.

Abaturage basabwa gukomeza ingamba z'ubwirinzi, ndetse n'abivuza bakarushaho gukurikiza inama bahabwa mu rwego rwo guhashya Malariya.