Abantu 48 bagwiriwe n'ikirombe cya zahabu bahita bapfa

Harabarurwa abantu bagera kuri 48 barimo abagore n'abana, bivugwa ko bapfuye bazize impanuka y'ikirombe bacukuragamo zahabu mu buryo butemewe n'amategeko.

Amakuru y'iyi mpanuka yahitanye ubuzima bwa benshi yamenyekanye ku wa Gatandatu tariki 15 Gashyantare 2025. Bikaba byarabereye mu burengerazuba bw'igihugu cya Mali.

Ibitangazamakuru bitandukanye byatangaje ko iki ikirombe cyaridutse mu gihe abantu bari binjiyemo bashakisha zahabu. Bikavugwa ko bamwe bapfuye kibaguye hejuru abandi bakagwa mu mazi.

Muri iki gihugu cya Mali, muri 2024 abandi bantu basaga 73 bagwiriwe n'inkangu bahita bapfa. Ni mu gihe kandi muri Mutarama 2025 nabwo byisubiyemo.

Banki y'isi ivuga ko zahabu muri Mali zigira uruhare rungana na kimwe cya kane cy'ubukungu bw'iki gihugu.

Ahanini abaturage bakaba bishora muri ubu bucukuzi birengagije ingamba z'ubwirinzi ari nabyo bibakururira kuhasiga ubuzima.