Ikoreshwa ry'ingufu za Nikeleyeri ni ingenzi mu kuziba icyuho kiri muri Afurika- Dr Ngirente

 

Inararibonye muri politiki n’iterambere zisanga ibihugu bya Afurika bikwiye gukora ibishoboa byose bikonera ingufu z’amashanyarazi, kuko biri mu byakwihutisha iterambere ry’uyu mugabane.

Ibi ni bimwe mu byagarutsweho ku munsi wa mbere w'inama Nyafurika ku mikoreshereze y'ingufu za nikeleyeri mu rwego rwo gukemura ikibazo cy’amashanyarazi muri Afurika.

Gushakira hamwe igisubizo cy'ikibazo cy'ubuke bw'amashanyarazi kuri uyu mugabane wa Afurika ni imwe mu ngingo nyamukuru irimo kuganirwaho muri iyi nama.

Ubufatanye bw'ibihugu byo ku mugabane wa Afurika ni kimwe mu byo Minisitiri w'Intebe wungirije wa Tanzania, Dr. Doto Mashaka Biteko asanga ari inkingi ikomeye mu kuvanaho icyo cyuho.

Yagize ati "Gukuraho izi mbogamizi, iyi nama iradusigira amahirwe menshi ku gihugu cyacu cya Tanzania ndetse na Afurika muri rusange, kugira ngo dusangire ibitekerezo tunashakire hamwe ibisubizo bifatika mu ikoreshwa ry'ingufu za nikeleyeri. Turizeza imikoranire inoze n'abafatanyabikorwa bacu kugira ngo Nikeleyeri ibe kimwe mu bigize urusobe rw'ingufu dukoresha ndetse tube twakwihuza nayo."

Iyubakwa ry'inganda za Nikeleyeri zifashishwa mu gutunganya amashanyarazi zizwi nka Small Modular reactors ni kimwe mu bitegerejwe nk'igisubizo kirambye ku kibazo cy'amashanyarazi ku mugabane wa Afurika.

Umuyobozi w'ihuriro rya Nikeleyeri ku isi, Dr. Sama Bil we asanga kuziba icyo cyuho bikwiye kujyana no kugira inararibonye mu bya siyansi bashobora gufasha uyu mugabane mu ishyirwa mu bikorwa ry'imishinga ya Nikeleyeri.

Minisitiri w'Intebe, Dr. Edouard Ngirente yagaragaje ko ikoreshwa ry'ingufu za nikeleyeri ari ingenzi mu kuziba icyuho kigaragara mu rwego rw’ingufu muri Afurika.

"Iki cyuho mu ikoreshwa ry'amashanyarazi gikomeje kudindiza iterambere ry'Umugabane, mu kuziba icyo cyuho rero ubu ibihugu byacu bikwiye gukorera hamwe mu gushaka igisubizo cy'uburyo amashanyarazi yatunganywa. Kimwe mu bisubizo byiza kuri Afurika mu kugera ku ntego yayo y'iterambere ni ugukoresha mu buryo bwihuse ingufu za nikeleyeri mu gutunganya amashanyarazi ndetse no mu bindi bikorwa byo mu nganda, nkuko mubizi ingufu za nikeleyeri zibarwa nk'ingufu zisukuye zitangiza ikirere.

Icyerekezo cy’u Rwanda 2050 giteganya ko muri 2035 u Rwanda ruzaba ruri mu bihugu bifite ubukungu bugereranyije naho mu 2050 rukazaba rufite ubukungu buteye imbere.