Benshi ntibabizi! Kayonza niko karere ka mbere kanini mu Rwanda

Twifashishije ubushakashatsi buheruka, Akarere ka Kayonza mu Rwanda niko gafite ubuso bunini kurusha utundi turere two mu gihugu, ni mu gihe kandi uturere twose tw’Intara y’Iburasirazuba turi muri 15 twa mbere tunini cyane.

Hari abantu benshi bagira urujijo ku karere kanini kurusha utundi mu Rwanda, ndetse hari na zimwe mu mbuga zo kuri Interineti ushakishirizamo amakuru ushaka kumenya akarere kanini mu Gihugu hakaza Akarere ka Nyagatare.

Ibi byatumye URUMURI MEDIA ishaka kumenya neza uko uturere turutanwa mu gihugu.

Ibiri muri iyi nkuru ni bimwe mu byashyizwe ku mbuga zemewe za interineti z’uturere, n’ibyavuye mu ibarura rusange rya 11 riheruka mu mwaka wa 2022.

Kayonza niko karere ka mbere mu gihugu gafite ubuso bwa Kilometerokare 1935, ni kamwe mu turere dufite inzuri nyinshi ndetse igice kinini cya Pariki y’Akagera kibarizwa muri Kayonza, ni akarere gatuwe n’abaturage 457,156

Akarere ka Nyagatare niko gakurikira mu bunini gafite ubuso bwa kilometerokare 1919, ni akarere ka kabiri mu gihugu gatuwe n’abaturage benshi nyuma ya Gasabo mu mujyi wa Kigali, ni akarere kandi gafite ibyanya bigari by’ubuhinzi n’ubworozi, n’igice kiri muri Pariki y’Akagera, niko karere ka mbere gafite inka nyinshi.

Utundi turere tuza mu myanya 10 ya mbere, harimo Gatsibo, Bugesera, Nyamasheke, Rutsiro, Kirehe, Nyamagabe, Nyaruguru na Karongi.

Kuri uru rutonde rw’uko uturere dukurikirana mu kugira ubuso bunini hari ikindi gitangaje cy’uko hari uturere tubiri dufite ubuso bungana utwo ni Gisagara na Ngororero, twose turi kuri Kilometerokare 679.

Urutonde rw'uko dukurikirana:

1. Kayonza 1935 Km2

2. Nyagatare 1919 Km2

3. Gatsibo 1583.3Km2

4. Bugesera 1337 Km2

5. Nyamasheke 1174 Km2

6. Rutsiro 1157.3 Km2

7. Kirehe 1118.5 Km2

8. Nyamagabe 1090 Km2

9. Nyaruguru 1010 Km2

10. Karongi 993 Km2

11. Rusizi 940.45 Km2

12. Ngoma 867.74 Km2

13. Gicumbi 829 Km2

14. Gakenke 704.06 Km2

15. Rwamagana 682 Km2

16. Gisagara 679 Km2

17. Ngororero 679 Km2

18. Nyanza 671.2 Km2

19. Kamonyi 655.5 Km2

20. Muhanga 647.7 Km2

21. Burera 644.5 Km2

22. Ruhango 626.8 Km2

23. Huye 581.5 Km2

24. Rulindo 567 Km2

25. Nyabihu 531.5 Km2

26. Musanze 530.2 Km2

27. Gasabo 430.30 Km2

28. Rubavu 388.3 Km2

29. Kicukiro 166.7 Km2

30. Nyarugenge 134 Km2