Nyarugenge: Fatakumavuta yaburanye mu mizi ahakana ibyo ashinjwa byose

Urukiko Rwisumbuye rwa Nyarugenge rwaburanishije urubanza mu mizi ruregwamo SENGABO Jean Bosco uzwi mu myidagaduro nka Fatakumavuta ku byaha akurikiranyweho.  

Inkuru dukesha Ubushinjacyaha Bukuru ivuga ko Fatakumavuta yaburanye ahakana ibyaha byose akurikiranyweho uko ari 5 ndetse ahakana yivuye inyuma raporo y’abahanga yagaragaje ko anywa ibiyobyabwenge avuga ko atizeye ibyakozwe na Rwanda Forensic Institute (RFI) asaba kongera gupimwa.

Yakomeje avuga ko ibindi byaha bisigaye yabivuze nk’umusesenguzi w’umunyamakuru kandi wo mu gice cy'imyidagaduro bityo ko bitagize ibyaha. 

Urubanza rwe rukaba rwapfundikiwe rukazasomwa ku itariki ya 06 Kamena 2025. 

Fatakumavuta yatawe muri yombi akurikiranyweho ibyaha bikurikira:

Icyaha cyo kunywa ibiyobyabwenge (byo mubwoko bw’urumogi); Giteganywa kandi kigahanishwa n' ingingo ya 263 y'itegeko Nº68/2018 ryo ku wa 30/08/2018 riteganya ibyaha n’ibihano muri rusange.

Icyaha cy’ivangura: Giteganywa kandi kigahanishwa n' ingingo ya 163 y'itegeko Nº68/2018 ryo ku wa 30/08/2018 riteganya ibyaha n’ibihano muri rusange;

Icyaha cyo Gutangaza amakuru y’ibihuha: Icyaha giteganywa kandi kigahanishwa n’ingingo ya 39 y’ ITEGEKO No 60/2018 RYO KU WA 22/8/2018 ryerekeye gukumira no guhana ibyaha bikoreshejwe ikoranabuhanga.

Icyaha cyo Gukangisha gusebanya: icyaha Giteganywa kandi kigahanishwa n' ingingo ya 129 y'itegeko Nº68/2018 ryo ku wa 30/08/2018 riteganya ibyaha n’ibihano muri rusange.

Icyaha cyo Gutukana mu ruhame icyaha Giteganywa kandi kigahanishwa n' ingingo ya 161 y'itegeko Nº68/2018 ryo ku wa 30/08/2018 riteganya ibyaha n’ibihano muri rusange.