Minisitiri Dr Uwamariya yagarutse ku kamaro kadasanzwe k'Urusobe rw'Ibinyabuzima

 

Mu gihe kuri uyu wa Kane tariki ya 22 Gicurasi 2025, u Rwanda rwizihiza umunsi mpuzamahanga w'urusobe rw’ibinyabuzima. Minisitiri w'Ibidukikije Dr Uwamariya Valentine yagarutse ku gaciro kadasanzwe k'urusobe rw'ibinyabuzima.

Mu butumwa yanyujije kuri konti ye ya X, Minisitiri w'Ibidukikije, yavuze ko Urusobe rw'Ibinyabuzima rufatiye runini isi; dore ko rutuma habaho kwihanganira impinduka, guhangana n'uburwayi, gutuma ubutaka burumbuka hakaboneka ibiribwa bihagije, tutibagiye n'iterambere ry'ubuvuzi hamwe n'ubukerarugendo.

Uyu mwaka wa 2025, insanganyamatsiko igaruka ku kubana neza n’urusobe rw’ibinyabuzima nk’isoko y’iterambere rirambye.

Mu kwizihiza uyu munsi mpuzamahanga, Minisiteri y'ibidukikije yongeye kwibutsa Abaturarwanda bose gufatira hamwe ingamba zo kubungabunga no kurengera ibidukikije hagamijwe iterambere rirambye.

Guverinoma y'u Rwanda ikomeje ibikorwa bitandukanye mu kubungabungabunga urusobe rw'ibinyabuzima, ndetse bikanateza imbere ubukerarugendo bumaze kugera ahashimishije, nk'uko biherutse gutangazwa n'ikigo cy'igihugu cy'Iterambere (RDB).