Imyaka 50 irashize u Rwanda rwizihiza umunsi mpuzamahanga w'umugore

Umunsi Mpuzamahanga w'Umugore washyizweho n’Umuryango w’Abibumbye mu 1972, ugamije kugaragaza ibyagezweho mu iterambere ry’uburinganire bw’Abagabo n’Abagore, uburenganzira no kubaka ubushobozi bw’umugore.

Uwavuga ko u Rwanda ari kimwe mu bihugu bimaze gutera intambwe ihambaye mu guteza imbere igitsina gore, ntiyaba abeshye; dore ko kera umugore atahabwaga agaciro yari akwiye. Kuri ubu ntibagihezwa mu bikorwa bifitiye akamaro igihugu kimwe na bagenzi babo b'abagabo.

Impamvu nyamukuru ituma ku isi hizihizwa uyu munsi, ni uko ahanini abagore n’abakobwa ku isi hose nabo bagira uruhare rukomeye mu kubaka ubukungu, umuco, politike n’iterambere muri rusange.

Ku rwego rw’isi, uyu munsi wizihijwe ku nshuro ya 53, naho mu Rwanda ni ku nshuro ya 50, hashimangirwa intambwe yatewe mu kubahiriza ihame ry’uburinganire bw’abagore n’abagabo, abakobwa n’abahungu mu buzima, mu bukungu, imibereho n’imiyoborere myiza.

Inama y'Igihugu y'Abagore, yatangaje ko kuri uyu wa Gatandatu tariki 8 Werurwe 2025, u Rwanda rwifatanyije n'Isi mu kwizihiza Umunsi Mpuzamahanga w'Umugore ufite insanganyamatsiko "Umugore ni uw’agaciro".

Ibirori byo kwizihiza uyu munsi no kuzirikana ibikorwa by'indashyikirwa abagore bakomeje kugeza ku Rwanda biri kubera hirya no hino mu Gihugu ku nsanganyamatsiko igira iti 'Umugore ni uw'agaciro'.

Ku rwego rw'Igihugu, uyu munsi mpuzamahanga wizihirijwe mu murenge wa Hindiro w'akarere ka Ngororero. Ni nako kandi no mu tundi turere hagiye hakorwa ibikorwa bitandukanye mu rwego rwo guha agaciro uyu munsi udasanzwe.