Rwamagana: Abanyeshuri biga ubuvuzi basuzumye ku buntu abaturage basaga 1,000

Abanyeshuri biga ubuvuzi muri Kaminuza y'u Rwanda, by'umwihariko mu ishami ry'Ubuforomo n'Ububyaza i Rwamagana, ku bufatanye n'ubuyobozi bwa Kaminuza bateguye igikorwa cyo gusuzuma indwara mu baturage mu rwego rwo guteza imbere imibereho myiza n'ubuzima bwiza aho biga.

Ku ikubitiro abaturage bagera ku 1,000 biganjemo abakuze bakora umwuga w'ubucukuzi bw'amabuye y'agaciro basuzumwe indwara zitandukanye zirimo Umuvuduko w'amaraso, Ubwandu bwa virusi itera SIDA, Diyabete hamwe n'Igituntu.

Iki gikorwa cyabaye ku wa Gatanu tariki ya 14 Gashyantare 2025, aho urubyiruko rwiga muri kaminuza y'u Rwanda Ishami rya Rwamagana rwagiye mu murenge wa Musha w'akarere ka Rwamagana, rugasuzuma ku buntu abaturage barimo abakozi ba kompanyi ikora ubucukuzi bw'amabuye y'agaciro izwi nka Trinity Metals LTD.

Abaturage bishimiye iki gikorwa cy'indashyikirwa cyatangijwe n'aba banyeshuri biga ubuvuzi muri Kaminuza y'u Rwanda Ishami rya Rwamagana. Bavuga ko bibafasha kumenya uko ubuzima bwabo buhagaze, ndetse bakanarushaho kwirinda.

Abari bitabiriye iki gikorwa ku bwinshi banaboneyeho gusaba inzego zitandukanye ko igikorwa nk'iki cyahoraho.

Bitewe n'ubwinshi bw'abaturage bari bitabiriye iki gikorwa, hari abatarasuzumwe bitewe n'uko ibikoresho bimwe na bimwe byifashishwa mu gusuzuma byari byashize. Abanyeshuri bakaba bifuza ko ubutaha babona ibikoresho bihagije.

Ikigo Nderabuzima cya Musha nacyo cyagize uruhare rukomeye mu kubona ibikoresho byifashishijwe, ari nabyo byatumye abaturage benshi basuzumwa nta kiguzi batanze.

Usibye gusuzuma indwara ndetse no gusobanurira abaturage uburyo bwo kuzirinda, aba banyeshuri babifatanyije n'ubukangurambaga batangije bugamije kurwanya ihohotera rishingiye ku gitsinda n'iribera mu miryango.

Shukuru Benjamin, ni umwe mu banyeshuri bari bahagarariye abandi, mu butumwa yagejeje ku baturage harimo ko ari inshingano za buri wese gukumira amakimbirane n'ihohotera ry'ubwoko ubwo ari bwo bwose; bigatuma habaho umuryango utekanye kandi uteye imbere.

Aba banyeshuri batangije ubu bukangurambaga bwiswe 'Menya Urinde Ubuzima' bwo gukumira indwara no kurandura ihohoterwa n'amakimbirane mu miryango, bifuza ko bakomeza gushyigikirwa ku buryo babasha kugera ku baturage benshi b'ingeri zitandukanye.